فاكر يوم أول محاضرة؟

لما كت كل الطلبة حاضرة

وكانت لسا الدنيا وردي

وكت سنتنا ساعتها خضرة؟

فاكر مبني الإمتحان؟

فاكر توزيعة اللجان؟

فاكر الطرقة الطويلة

والوشوش القلقانين؟

وأما الورقة تيجي صعبة

بس نطلع مبسوطين؟

فاكر لما كان يتبقي ورقة

وكنت تصر تبات قاريها

وكنت أقول والله مافارقة

ونصبح الصبح نلاقيها؟

فاكر ورقة الباطنة وليلتها؟

فاكر لما من طول أسئلتها

كنت عارف كل الإجابة

بس ملحقتش تكتب بقيتها؟

فاكر عملي الجراحة

لما كنت عندك سهرانين

بنقول ياتري بكرة هدخل لمين؟

لما كنت ساعتها تدعي

وأنا وراك بقول آمين؟

كنا نقول يارب هون

دحنا عبادك غلبانين

بكرة هيبقي مرة أحلي

ولا هنفضل تعبانين؟

كانت أيام مرارتها حلوة

كان انهاردة ساعتها فكرة

وامبارح كان لسا بكرة

وبكرة يبقي انهاردة ماضي

وبعده بكرة هيبقي ذكري

مكناش نعرف ساعتها

إن أما نكبر هنرجع عيال

وساعتها هنحتاج إجابة

بس منعرفش السؤال