كلية الطب .. مزايا الخط ومميزات الكارت !!

اللى يعيش ياما يشوف ..
اما ما "شفناه" فكان خبر الموسم الذي تداولته الصحف على مدار اكثر من شهر كامل بأن الحد الادنى للقبول بكلية الطب هو 99% .. طبعا كلكم فاكرين احنا دخلنا الكلية بـ 96.9 % ...
أما المسئولين عن هذه المأساة فقد سكتوا دهرا ونطقوا كفرا .. فالتصريحات أكدت ان اعداد المقبولين في كليات الطب ثابت ولم يتم تخفيضه .. وأن السبب في رفع درجة القبول بالكليات هم الطلبة انفسهم
وتذكرت عن قراءة مثل هذه التصريحات تحقيقا أجرته مجلة الشباب منذ اكثر من عشر سنوات عن طلبة كليات الطب .. وان تقدير الامتياز صار يحصل عليه اكثر من 25% من الطلبة .. واخذ عمداء كليات الطب يقولون كلاما كثيرا دار كله حول معنى واحد .. " يابيه نعمل ايه بسفي الطلبة ولاد الـ ... دول .. يعني بنطلع ميتينهم طول السنة ونقولهم على حاجت ونجيب غيرها .. ونشنيرهم في العملى والشفوى .. وننزلهم موز في التحريري .. وبرضه بيجيبوا امتياز .. طب نعملهم ايه بقى ؟؟! "
أما اكثر ما أثار غيظي هو هذا التكالب على كلية الطب .. على ايه يعني ياجدعان .. ان كل الناجين من هذه الكلية لايدركون كم يحسدهم الطلية على نعمة ربهم عليهم .. فمن المعروف أن كلية الطب تحتوى على العديد من الميزات والمميزات التى يواجهها الطالب منذ دخوله الكلية ليدرك مدى شؤم مصيره ومقدار الابتلاء الذي وضع فيه .. ورغبة منى في تخليص ضميري امام الله اضع هذه الحقائق امام طالب الطب الجديد - الله يرحمك يابني - ...

العدد :
هو أول ماتصدم به في الكلية .. فالاعداد مهولة .. والامكانيات لاتناسب هذا العدد بالطبع .. يعني متستغربش لو لقيت اكتر من تمانين واحد حوالين الجثة .. واكتر من خمسين واحد حوالين العيان .. ده لو لقيتهم يعني .. فانت الذي اخترت منذ البداية .. واشرب يابرنس ..

خدعوك فقالوا .. كلية عملية :
فمن المعروف أن كليتنا يمكن ان توصف بألف وصف ليس منها أنها "عملية" ..الا لو اعتبرت انها عملية مثل عملية استئصال الخصية .. فعندها يمكن التجاوز عن الأمر .. اما الواقع المرير ان الكلية مذاكرة النظري بها اكثر من اغبى مادة ادبي في ثانوية عامة .. اما السكاشن و الدروس العملية فليس الهدف منها التعليم التطبيقي للنظري .. فالهدف منها هو الحصول على العشرة جنيه تمن الكارنيه واللوج بوك .. معلش ياسيدي مجتش على دى ..

الامتحانات :
حدث ولا حرج .. فالامتحانات في كلية طب مثل الزلازل والاعاصير مستمرة ودائمة ولا تتوقف .. ولا يمكن التنبؤ بامكانية وقوعها .. وهى دائما مدمرة .. فطالب الطب يفاجأ بامتحان الميدترم الأول لسنة أولى .. يدخل بعدها في دوّامة لا يفق منها الا بتسلمه شهادة حسن السير والسلوك ( البكالريوس) .. كفارة ياراجل .. ومتنساش وانت داخل تاخد معاك العيش والحلاوة ..

كذبة ابريل .. " انا هارتّب على الدفعة " :
طبعا عند دخولك الكلية تكون مدركا تماما ان المستقبل المضمون هو في التعيين في الجامعة .. وعند معرفتك ان التعيين يكون لحوالى 100 طالب كل عام ينتابك احساس كاذب انك يمكنك أن تفعل ذلك بسهولة .. ايه ياجماعة مانا جبت 99% في ثانوية عامة .. مش هاعرف اطلع من الميّة الأوائل يعني ؟؟ .. وطبعا لن اقنعك أن هذا الأمر شبه مستحيل وخاصة لقراء مدونتنا الكرام ..وأنك ستجد طرق عجيبة يتبعها الطلبة للمذاكرة وخصوصا من أعضاء نادى الفرّاخة .. وستدرك الحقيقة المرّة عند تعليق نتيجة أولى .. طبعا انت لسه مش مصدقنى مش كده .. غلبان !!! ..

الخدعة الكبرى .. "اتعب النهاردة عشان تستريح بكره " :
اوعى يابني تصدق الكلام ده .. عارف ابليس بيغوى الناس ليه ؟؟ .. عشان ميقعدش في جهنم لوحده .. والحقيقة انك لو ذاكرت في ثانوية عامة هايطلع ميتينك في طب .. ولو رتبت في سنه هايطلع صاحيينك عشان تحافظ على الترتيب .. ولو اتعينت هاتطلع ايمانك عشان تاخد ماجستير .. وهكذا .. فهى حلقة مفرغة .. ولكن الحقيقة انك سترتاح فعلا في النهاية .. الراحة الأبدية ..

تضييع العمر :
لو مش فارقة معاك انك تخلص الكلية وانت عندك 25 سنة .. وتتجوز - ده لو اتجوزت - وانت عندك 30 سنة .. وتبدأ تاخد مرتب مناسب (مش كبير أوى أو مش كبير خالص ) وانت داخل عالاربعين .. ولو ميزعلكش ان العيال اللى كانو في ابتدائية وانت داخل الكلية هايبقو داخلين أولى طب وانت في سادسة .. ولا يزعلك انك تكون رايح درس الجراحة وتقابل صاحبك اللى متجوز وبيشتغل وفاتح بيت وهيسافر السعودية الشهر الجاى .. يبقى ادخل الكلية دى .. انت انسان صميم يابني والله ..

أخيرا وليس آخرا .. المستقبل المبهر :
فبين 150 جنيه تستلمها أول كل شهر في الامتياز .. و 200 جنيه عند تعيين الصحة .. و250 جنيه عند تعيين الكلية .. وبين الشفت الـ12 ساعة التى لايتعدى ثمنها بأى حال من الأحوال الـ40 جنيه .. أنصحك بانك تحجز البورش بتاعتك من دلوقتى عشان عليها طلب جامد من خريجين الطب .. عشان ياراجل متمشيش كتير على رجلك

لكن الصورة ليست بهذه القتامة فمن اهم مميزات كلية الطب أنك لا تصاب بالشيخوخة .. لأنك في الاغلب تموت في عز شبابك ..

هذه هى الحقائق كاملة يابني .. فانج بنفسك خلال فترة التحويل في أول العام ولاتكرر خطأ وقع فيه الآلاف من النادمين طلبة كليات الطب ..

ولمن لم يلحق بكلية الطب هذا العام - وكل عام - .. اقول بالنيابة عن نفسي وبالأصالة عن اكثر من 5000 طالب .. بنحسدكوا ياولاد المحظوظة !!

أما زملاؤنا من الطلبة القدامى .. وخصوصا اللى مستنين دفعة مليئة بالحريم الجامدين أو بالرجالة الروشين .. فاحب اقولكم " هارد لك " .. انسوا .. كل اللى داخلين جايبين 99% .. يعني عشم ابليس في الجنة

وسلملى عالمترو

أبورمّانة