يوم ممتع جدا

يوم الدراسة التقليدي هو اليوم الذى تبدأه بلعن سلسفيل الكلية وانت بتصحى على صوت المنبه .. وبينما انت تغسل وجهك ( لوكنت بتغسله يعني ) بتتمنى ان النهاردة يبقى احسن من امبارح .. لكن هل فعلا بيحصل كده ؟

الساعة 9ص : عايز اروح المحاضرة .. بدور العربية من ربع ساعة مش عايزة تدور .. المحاضرة مهمة ياجدعان وفيها شيت .. لازم اتصرف بسرعة .. وقفت في الشارع كده واستجمدت اتنين .. يابو الشباب ممكن زقة والنبي .. وقعدو يزقونى رايح جاى .. الناس في الشارع اتلموا وكل واحد عمل فيها مستر مرسيديس اس كلاس.. واحد يقول شكل البطارية نايمة .. والتانى يقول اكيد مامشتش بيها من زمان .. والتالت يرد طب افتح الكبوت كده تقريبا سلك الموبينة ملمس .. ركنت العربية ووقفت تاكسي .. كلية طب ياسطة ؟.. فووووو

الساعة 10ص : واقف ادام باب المدرج .. طبعا فهمتو ان الباب اتقفل الساعة 9 وخمسة .. تحالف قوى الشعب العامل تطالب عم محمد يفتح الباب .. ويرد علينا لايمكن ابدا ياولا ( ياولاد) اكديه (كده) الدااكتورة (الدكتورة) تجيب أجلى .

الساعة 11ص : الناس طالعة من المحاضرة .. كل واحد يطلع اسأله .. معاك شيت زيادة .. طب انت معاك شيت زيادة .. وعرفت كمان ان الدكتورة سجلت اسامى اللى حضروا عشان ياخدوا درجات اعمال السنة (معرفش ازاى بيعرفو يسجلو غياب 700 واحد كل يوم ) .. طيب حد كتب اسمى ؟ .. برضه لأ .. اه ياولاد الـ...

الساعة 12ظ : واقف قدام لوحة اللى جابو 27 في الترم الأول (دى الفول مارك وماتسألش ليه 27 مش 30 يعني .. ماجتش على دى ) .. أو زي مابحب اسميها قايمة اجمد سبعة الساعة سبعة .. ماتستغربش لو مالقيتش اسمك في اجمد سبعة الساعة سبعة ولقيت اسامى كل اللى ماحضروش محاضرات معاك .. ماجتش على دى كمان ياراجل..

الساعة 1ظ : في مدرج الفارما قبل السكشن .. الحالة العامة غير مشجعة .. مجموعة من الطلبة راحت في سبات عميق .. ومجموعة اخرى بتلعب في الموبايل .. وبعض الطلبة فاتحين بقهم معرفش ليه؟ يمكن حرانين ولا حاجة .. اما اعضاء "نادى الفرّاخة " (راجع موضوع نادى الفرّاخة في المدونة) فشغالين مع الدكتور الله ينور .. عدة أدوية يتم تداولها بين أعضاء النادى وبين الدكتور الله ينور (ده اسمه) .. ميّلت على اللى جنبي عشان يديني نفس من السيجارة اللى معاه .. وفي نفس اللحظه انقض عليا الدكتور زي النسر اتخيلت انه عايز نفس هو كمان .. لكن للأسف قالى انت يالى لابس اصفر كنارى هناك .. لو عندك سؤال قوم واسألهولى .. اتنحنحت شوية كده وقلتله يادكتور هو الميثيل امينيت(مفيش حاجه اسمها كده طبعا) بيعمل ايه في الكارديو فاسكولار .. راح الدكتور باصص في الارض وعدل نضارته في تركيز وبصلى جامد أوى .. أكيد هايطردني .. راح قايلي هو مش عليكو هو postgraduate بس شكلك كويس وبتقرى من مراجع .. ابقى تعالى بعد السكشن وانا اقولك عشان ماشتتش زمايلك..

الساعة 2ظ : خارج من سكشن الفارما ورايح على الباثولوجى(ادعولى)

الساعة 3ظ : واقف ادام الميكروسكوب .. يعني مش ادامه أوى .. فيه حوالى 25 واحد عايزين يشوفو الشريحة قبلى .. بحاول اسمع الدكتورة بتقول ايه لكن الصوت مش واصل .. شايف الدكتورة عمالة تفتح بقها وتقفله وكل الناس عمالين يهزو دماغهم في رضا .. اكيد بتحاول تشرحلهم الشريحة ..

الساعة 4م : رايح الدرس .. ايوه باخد درس عندك مانع ؟

الساعة 5م : في الدرس .. محاولات بائسة لمقاومة النوم .. دماغى عمالة تسقّط يمين وشمال .. تثاؤب مستمر .. شجع على ذلك المادة العلمية الممتعة اللى في الدرس .. ببص في الساعة كل خمس دقايق ..

الساعة 6م : مروح البيت ..

الساعة 7م : بتغدى ..

الساعة 8م : قاعد ادام التليفزيون بتفرج على برنامك (برنامج) البيض بيضك (البيت بيتك) .. حوار ساخن جدا عن شيكسبير .. وهل كان مذهبه استروائي أم استقرائي ؟ ..

الساعة 9م : زميلي في السكشن بيتصل بيا على التليفون .. رديت الو .. ايوه يابني .. قالى اخبار مذاكرة الامتحان ايه ؟ .. قلتله امتحان ايه جنابك ؟ .. قالى انت مسمعتش الدكتورة في سكشن الباثولوجى ولا ايه ؟ .. بكره في امتحان شفوى في سكشن المتحف في كل اللى اتشرح الاسبوعين اللى بعد الميدترم..

الساعة 10-12 م : بحاول اذاكر اى حاجه للامتحان .. طلاسم و كلام غريب .. ضاعت الساعتين مابين عمل 4 كبايات شاى و بص في السقف وعد النملات اللى في الكتاب ..

الساعة 1ص : انتهيت من عمل البراشيم اللازمة لامتحان الغد بالاتفاق مع الجعرّ للاستفادة من كل الوقت ولضمان عدم التداخل بين البراشيم ..

الساعة 2ص : داخل انام بس حاسس ان بكره هايبقى احسن .. سمعت هاتف في المنام بيقولى أبّص .. ..

أبورمّانة